“المشي للحامل.. راحة ليكي وفوايد كبيرة للبيبي”
كتبت مي علوش
فترة الحمل من الفترات الحساسة والمميزة في حياة كل أم، واللي بيكون فيها الجسم معرض لتغيرات كبيرة سواء بدنيًا أو نفسيًا. ووسط كل النصائح اللي بتتقال، دايمًا بيظهر سؤال مهم: هل ممكن تمارسي رياضة بسيطة زي المشي وإنتِ حامل؟ والإجابة هي: أيوه، المشي المنتظم مش بس آمن، لكنه كمان مفيد جدًا لصحتك وصحة الجنين.
تستعرض لكم طب توداي في هذا التقرير أهم الفوائد والنصائح المرتبطة بالمشي أثناء الحمل، واللي بتساهم في تعزيز الصحة الجسدية والنفسية للأم والجنين.
المشي من أبسط وأسهل الرياضات اللي ممكن تمارسها الحامل، من غير ما تحتاج معدات خاصة أو تجهيزات. لما بتمشي بانتظام، بتحسني الدورة الدموية، وبتقللي من مشاكل تورم الرجلين واحتباس السوائل، وكمان بتحسّني الهضم وبتخففي من الإمساك، ودي من أكتر الشكاوى اللي بتواجه الحوامل.
ومن الفوايد الكبيرة كمان، إن المشي بيساعد في تحسين الحالة المزاجية وتقليل التوتر والقلق، اللي بيكونوا شائعين جدًا في فترة الحمل. ده غير إنه بيساعد في ضبط الوزن، وبيقلل من احتمالية الإصابة بسكري الحمل أو ارتفاع ضغط الدم، وبيهيّئ الجسم للولادة بشكل أسهل.
أما بالنسبة للجنين، فالمشي بيساعد على تدفق الدم والأكسجين بشكل أفضل للمشيمة، وده بيساهم في تغذية سليمة ونمو صحي للطفل. كمان بعض الدراسات أشارت إن الحوامل اللي بيمشوا بانتظام ممكن يكون عندهم فرصة أكبر في ولادة طبيعية وسهلة.
لكن مهم جدًا إن الحامل تستشير طبيبها قبل بدء أي نشاط بدني، خصوصًا لو عندها حمل حساس أو مشاكل صحية. والمشي لازم يكون في أماكن آمنة، بإيقاع معتدل، ومع لبس مريح وأحذية مناسبة، وكمان لازم تشربي مياه كفاية.
