وصف الرجالة بـ “الخناشير” .. طبيب عجوز يهين مهنة التمريض ويعلق: الستات التمريض “قمر الليالي”

أثار الدكتور الجوهري محمد الجوهري طبيب جراح بـ قصر العيني الجدل، بتصريحاته حول مهنة التمريض، وذلك بعدما نشر بوست عبر حسابه الرسمي، وقام بوصف الممرضين الرجال ب “الخناشير، والممرضين السيدات “بقمر الليالي”.

وكتب معلقًا خلال البوست: “الجرّاحين العواجيز اللي زي حالاتي طول عمرهم متعودين إن حكيمة العمليات بتبقي واحدة ست، متجوزة بقي و لا بنت بنوت مش مهم ، المهم إنها تكون ست، الستات برضوا حنينين، و البصّه في وشّهم بتشفي العليل ، فما بالك بالجراح الشقيان ! و بعدين هما أساتذتنا القدام زمان كانوا هبل مثلا ، اشمعنا يعني اختاروا الستات لغرف العمليات !! كانوا أساتذة بجد ، حتي في اختياراتهم، و عشنا علي كده سنين وسنين أنا و الجراحين ، المخضرمين اللي زي حالاتي: الحكيمات ؛؛ ستات”.

وتابع: “لغاية ما اقتحم المهنة ، الخناشير، الرجّالة يعني ، تلاقي الواحد من دول طول بعرض و بيشتغل حكيمة عمليات ، طيب أنا طول عمري بسمي حكيمة العمليات اللي بتشتغل معايا في العملية ، بسميها ؛ قمر الليالي”.

وتابع : “هاتي مشرط يا قمر الليالي ، هاتي مقص يا قمر الليالي،أو امسكي الشفاط يا قمر الليالي ،و بتبقي مبسوطة و قلبها بينط من الفرحة ، من اسمها الجديد،إنما الأخ الخنشور ده هانده عليه و أقول يا إيه ؟”.

وجاءت التعليقات على المنشور بين مؤيد ومعارض لرأيه، حيث كتب أحدهم قائًلا “بوست غير موفق”، ويتفق معه في الرأي الدكتور عبدالوارث كسبه، قائلًا: “بصراحة أنا عكس حضرتك تمامًا.. الولاد التمريض اللي بيساعدوني في العمليات ممتازين، وبيتحملوا ضغط الحالة، ومركزين ومؤدبين جدًا.. وكمان التمريض البنات كويسين لكن بصراحة أنا ارتاح أكتر مع الولاد”.

وعلق آخر: “أعتقد أن الفيصل في تمريض العمليات هو الاتقان والضمير، التمريض المتقن يساعد الجراح أكثر من الطبيب المساعد وأحيانًا لو عنده خبرة ممكن يقترح على الجراح حلول شافها قبل كده، والضمير ضروري للتأكد من التعقيم والالتزام في وجود الأدوات المطلوبة وعد الشاش، وبالتالي يكون راجل أو ست مش فارقة”.