مكنش له علاقة بحالات تسمم.. أول تعليق من “بلبن” بعد واقعة غلق 12 فرعًا

حرصت إدارة محلات بلبن للحلويات، الرد على ماتداوله صفحات التواصل الإجتماعي حول غلق 12 فرعًا من فروعه بسبب حالات التسمم، وخاصة فروع محافظة الجيزة والشيخ زايد.

وقال في بيان رسمي له على صفحته الرسمية على الفيسبوك: “الغلق اللي حصل لفروع (بلبن) خلال الأيام اللي فاتت في مصر ما كانش له أي علاقة بحالات تسمم، ولا فيه أي بلاغ طبي أو تقرير رسمي بيقول كده”.

وتابع في كلامه قائلًا: “اللي حصل هو غلق إداري لأسباب تنظيمية، وإحنا بنتعامل معه بكل احترام وشفافية”.

واستكملت: “لكن اللي بيحصل حوالينا الأيام دي مش مفهوم، فيه موجة كبيرة من الكلام، وفيه تركيز غير معتاد، وفيه تساؤلات حوالينا إحنا كمان مش لاقيين لها إجابة واضحة، وبعض الصحف والمنصات اختارت العنوان اللي يولَّع، من غير ما تتأكد، ومن غير ما تراعي الكلمة هتروح فين وهتعمل إيه، ونسيوا أن (بلبن) فيه أكثر من 25,000 شخص بيشتغلوا بشكل مباشر، ده مكان أكل عيشهم ورزقهم، وبكل بساطة ممكن تتسبوا في قطع عيشهم”.

واستكمل :”وده مش موضوع (مين بيحب البراند ومين لأ)، ولّا (مين شايفه يستحق ومين شايفه لا، ده موضوع أرزاق.. أرزاق ناس كتير، ناس مالهاش أي ذنب في ده، اتقوا ربنا في الكلمة وفي النقل وفي التفسير”.

واختتم البيان: “لأن قطع الأرزاق مش لعبة، ولا المفروض يكون ثمنه إن حد يركب تريند أو يجمع تفاعل.. الموجة اللي علينا عالية.. واللي بيحصل مش بسيط، واحنا بنسأل نفس السؤال اللي كل الناس بتسأله: ليه؟ احنا مش ملايكة، بنغلط وبنصلّح، بس اللي بيحصل دلوقتي أكبر من مجرد ملاحظة أو مخالفة فيه شيء مش مفهوم إحنا مش فوق المحاسبة، ولا بندوّر على مجاملة، لكن اللي نطلبه بكل احترام شوية عدل.. وشوية رحمة”.

يُذكر أن، أصدر محافظ الجيزة، قرارًا، اليوم الأربعاء، بغلق ١٢ منشأة لبيع منتجات الألبان والحلويات تابعة لسلسلتَي محلات بلبن” و”بلين” بأحياء العجوزة والعمرانية وجنوب الجيزة والوراق وإمبابة ومدينة السادس من أكتوبر ومدينة الشيخ زايد ومركزَي الحوامدية والبدرشين.