نام بدري ومتزعلش قلبك! د. خيري أبوعمر يكشف أخطر أسباب وجع القلب

تواصل “طب توداي” مع الدكتور خيري أبوعمر، استشاري الباطنة والقلب والصدر، للرد على مجموعة من الأسئلة الشائعة بين الناس حول صحة القلب والصدر،  في هذا التقرير، نستعرض معكم أبرز الإجابات العلمية المبسطة على لسان الطبيب المتخصص، والتي تساعد في التفرقة بين الأعراض الخطيرة وتلك الشائعة

هل فعلاً النوم القليل بيتعب القلب؟

قال الدكتور خيري أبوعمر، استشاري الباطنة والقلب والصدر ، في تصريحات خاصة لـ طب توداي إن النوم أقل من 6 ساعات يوميًا ممكن يضر صحة القلب بشكل مباشر.

وأوضح إن الإنسان محتاج ينام من 6 لـ 8 ساعات متواصلين، وخصوصًا في الفترة من الساعة 10 مساءً لحد الفجر، لأن في التوقيت ده الجسم بيفرز هرمونات مهمة جدًا زي هرمون النمو والميلاتونين، اللي مش بس بيظبط الساعة البيولوجية، لكن كمان بيقلل فرص الإصابة بأمراض خطيرة زي السرطان، وبيساعد في راحة عضلة القلب وتجديد خلايا الجسم.

الزعل ممكن يعمل أزمة قلبية؟

أكد الدكتور خيري إن الزعل والانفعال مش بس بيأثروا على الحالة النفسية، لكن ليهم تأثير خطير على القلب. وبيوضح إن الجسم وقت الزعل بيدخل حالة تأهب، وبيفرز كميات كبيرة من الأدرينالين، والنورأدرينالين، والكورتيزول في الدم، وده بيأثر على الشرايين التاجية للقلب وبيسبب ضيق فيها، وكمان بيأثر على شرايين المخ، مشيرا إلى أن النتيجة ممكن تكون جلطة قلبية أو دماغية، أو ذبحة صدرية، وفي بعض الحالات الشديدة ممكن تؤدي للوفاة، خصوصًا لو الشخص عنده مشاكل في القلب من الأساس أو ضغطه عالي.

إزاي أفرق بين وجع القلب ووجع المعدة أو العضلات؟

وضح د. خيري إن الناس كتير بتتلخبط بين أنواع الوجع، لكن فيه فروق واضحة:

• وجع المعدة: بيكون في أسفل الصدر تحت الحجاب الحاجز، وغالبًا بيزيد بعد الأكل أو الشرب.
• وجع العضلات: سطحي، مش عميق. بيزيد لما تضغط بإيدك على مكان الألم أو لما تاخد نفس عميق. لو الألم بيقل مع الراحة أو التدليك، فغالبًا ده عضلي.
• وجع القلب: بيكون في منتصف الصدر خلف عظمة القص، ويمتد شوية ناحية الشمال، ساعات بيوصل لـالرقبة أو الذراع الأيسر. وميزته إنه بيظهر وقت المجهود، يعني لو مش قادر تتحرك أو تتنفس كويس، ووجعك بيزيد مع الحركة، لازم تروح للدكتور فورًا.

كمان قال الدكتور إن أحيانًا بيكون الألم نتيجة تيارات هوا (مروحة، تكييف، شباك) وده بيسبب ألم في عضلات القفص الصدري، بيكون شديد جدًا، لكنه بيخف مع التدفئة والتدليك، وده مختلف عن ألم القلب الحقيقي.